SRI AMAN: Raban nembiak patut ngembuan kualiti ke patut kena ngemansangka menua enti deka nyadi ketuai menua jemah ila, ku Menteri Muda Pemansang Tanah Datuk Francis Harden Hollis.
Ambika banding, penanggul gian dadah, kes buli, samseng, lari ari rumah sereta mayuh macham agi pengawa ke jai malut bala nembiak sereta ngirauka ati kitai, ku iya.
“Penanggul ke baka tu patut diseliah ngambika kitai ulih nempa nembiak rebak baru ke bisi kualiti sereta ulih ngiring menua jemah ila. Pengawa tu tau nyadi lempung enti bisi kerejasama penuh ari semua,” ku iya.
Harden ke mega Kaban Kunsil Nengeri (ADUN) Simanggang bejaku munyi tu lebuh ti bejadika ‘Program Pemuafakatan’ Begulai enggau Pengajar, Nembiak sereta Apai Indai nembiak primari 6/2011 ba Dewan Lau Ngee Mung, SJK Chung Hua Simanggang ditu ensanus.
Ba pekara tu ku iya, sekula megai tanggung pengawa ti beguna amat kena ngemujurka juluk menua.
Ditu mih sida teulihka pelajar sekula sereta dikearapka ulih nempa mayuh agi rayat ti mujur sereta mai pemansang ngagai menua.
Taja pia, pengawa tu patut bisi sukung sereta kerejasama ari semua, kelebih agi apai indai enggau mensia mayuh ba menua tu laban pengangkun bala nembiak empu bepun ari rumah.
“Lebuh nyadi pengari rayat ba sitak Simanggang tu, aku sigi ngarap sereta temegah ati enti sema bisi raban nembiak ba menua tu mujur nyadi mensia ke beguna sereta ngembuan ulah ti manah lalu angkunka diri empu.
“Aku bisi bendar pengarap ati, sekula ulih ngemujurka juluk tu nengah kerejasama ari semua.
“Arapka pengawa ke baka tu ulih dipajakka dudi hari ila kena nempa serak rebak dudi nyadi ketuai menua ti mujur sereta pegari,” ku iya.
Nandu nya baru ku Harden, kelimpah ari tanggung pengawa pengajar ba sekula, apai indai patut bekerejasama kena nentuka pemujur bala anak sida.
Apai indai mega patut anang ngerupitka belanja kena bala anak sida masuk kelas tuisyen ti disediaka.
“Aku nemu enti bala nembiak diajar enggau chara belajar ke betul, sida mudah agi meretika utai ti dipelajar sereta napi peresa lalu teulihka pemujur.
“Aku mega bisi bendar pengarap ati laban pemujur bala nembiak ditentuka pengawa ti dipejalaika bala pengajar enggau apai indai.
“Bala pengajar mega patut ditambah penemu baru kena nulung sida bejalaika kelas tuisyen.
“Nengah seminar kaunseling sereta bengkel pintar Matematik, ulih nulung bala pengajar ngangkatka prestasi sida sereta prestasi akademik bala nembiak,” ku iya.
Sama bisi ngulu pengerami nya Kepala Pengajar Sekula Jee Lian Fah, Kapitan Kuek Aik Seng enggau Pengulu Lee Siang Hua.
sumber ari utusan borneo
No comments:
Post a Comment